गिरीश आंदे (कळमेश्वर तालुका प्रतिनिधी)
घरगुती वापरासाठी सबसिडीवर उपलब्ध असलेल्या एलपीजी गॅस सिलेंडरचा व्यावसायिक वापर रोखण्यासाठी जिल्हा पुरवठा अधिकारी यांच्या मार्गदर्शनाखाली आणि तहसिलदार कळमेश्वर विकास बिक्कड यांच्या नेतृत्वात दिनांक 18 डिसेंबर 2025 रोजी तालुक्यांमध्ये विशेष धडक मोहीम राबविण्यात आली.
या मोहिमेत पथक प्रमुख मंगेश ढवळे निरीक्षण अधिकारी तसेच भरत ब्राह्मणकर गोदाम व्यवस्थापक व प्रविण मानकर पुरवठा निरीक्षक व गणोरकर कोतवाल यांच्या पथकाने कळमेश्वर शहरातील वेगवेगळ्या ठिकाणी छापे टाकून कारवाई केली. या कारवाईदरम्यान विविध हॉटेल्स,ढाबे आणि इतर व्यावसायिक आस्थापनांवर तपासणी करण्यात आली.
या कारवाईत घरगुती गॅस सिलेंडरचा व्यावसायिक वापर करताना आढळलेल्या व्यावसायिकांकडून एकूण 14 गॅस सिलेंडर जप्त करण्यात आले आहेत. ही सिलेंडर सबसिडीचा गैरफायदा घेऊन व्यावसायिक हेतूने वापरली जात होती, ज्यामुळे सरकारच्या सबसिडी योजनेचा दुरुपयोग होत होता आणि सामान्य नागरिकांना घरगुती गॅसचा पुरवठा प्रभावित होत होता.व्यावसायिकांनी निळ्या रंगाचे कमर्शियल एलपीजी सिलेंडर वापरावेत.घरगुती (लाल रंगाचे) सिलेंडरचा व्यावसायिक वापर हा कायद्याने गुन्हा आहे.
घरगुती गॅस सिलेंडर फक्त घरगुती वापरासाठीच आहेत. व्यावसायिकांनी निळ्या रंगाचे कमर्शियल सिलेंडर वापरावेत. व्यावसायिक वापर हा कायद्याने गुन्हा आहे. अशा प्रकारच्या गैरप्रकारांना आळा घालण्यासाठी यापुढे सतत छापे आणि तपासणी मोहीम सुरू राहील. यामध्ये दोषी आढळलेल्यांवर जीवनावश्यक वस्तू अधिनियमांतर्गत कठोर कारवाई करण्यात येईल.”
जप्त करण्यात आलेली सिलेंडर संबंधित गॅस वितरकांना सुपूर्द करण्यात आलेले असून,याप्रकरणी पुढील तपास सुरू आहे. तसेच तालुक्यांतील नागरिकांना व व्यावसायिकांना तहसिलदार विकास बिककड यांनी आवाहन केले की,घरगुती गॅस सिलेंडरचा व्यावसायिक वापर किंवा काळाबाजार करू नये. व्यावसायिकांनी निळे कमर्शियल सिलेंडर वापरावेत. अधिक माहितीसाठी पुरवठा विभाग, तहसिल कार्यालय येथे संपर्क साधावा, असे मंगेश ढवळे यांनी सांगितले.
